"Því miður sem betur fer"

Óborganlegt viðtal RÚV við fjármálaráðherrann,  Steingrím J. Sigfússon í kvöld, 5. ágúst. Það  var með því eftirminnilegasta sem lengi hefur sést á skjánum. Þar kom að ráðherrann var spurður um ástandið á fjármálamörkuðum og svarið var þetta, með öðru .....

Þessi óborganlegu  skemmtilegheit  minna okkur á að ekki er allt hávísindalegt í tilverunni, jafnvel þegar allt heila klabbið er á leið í hundsmagann. Þarna var okkar hæstvirti „Chancellor“, eins og nágrannar og bandamenn okkar á Bretlandseyjum kalla fjármálaráðherrann sinn – að ræða um endurfjármögnun og lántökur erlendis og þessi græskulausa gagnsögn hraut af vörum hans þegar hann var að ræða endurfjármögnun íslenskra banka á erlendum mörkuðum.  Hann var semsag allt í senn, sorgmæddur og glaður að þeir skyldu ekki vera að reisa sér hurðarása í viðskiptum við erlenda banka á frjálsum mörkuðum. Heima er best. En, Mr. Chancellor, hvað með músina í gildrunni?

Skrallið í evruvík heldur áfram. Ólli Rehn var sýndur í nýju Lagerfeld fötunum sínum í beinni útsendingu frá Stressborg þar sem hann lýsti því yfir að yfirsovétið hefði ýmislegt uppi í erminni til að takast á við skellinn sem evran og Evrópu-Sovétið urðu fyrir í glímunni við vindmylluna sem er þyturinn í seðlaprentvélunum og hrossastóði evrukeisarans. Stóðið er allt á spretti að leita nýrra haga. Gott er að vita og munu allir sparifjáreigendur og öreigar Evrópu sofa rótt í nótt af því að vita að Evrópa á svo trausta og úrræðagóða menn sem munu síðar visitera að hætti biskupa og preláta og dásama hin nýju föt keisarans af Bruxellium. Skyldu þeir vilja snæða signa grásleppu með oss?

Ríkiskassar vesturlanda eru tómir. Búið er að ræna sparifé almennings.  Börsen-hagkerfið er eins og tilberasmjör sem búið er að stökkva vígðu vatni á.  Búið er að veðsetja tekjur  tveggja ófæddra kynslóða velferðarríkjanna til að borga fyrir „jöfnuðinn“.  Gjaldmiðlar heimsins eru ónýtir bæði í raun og  lygi.  Stjórnmálamenn heimsins eru ráðþrota en eru samt mjög fínir og fall-legir í fallinu. „Þú færð hirð fyrir hross litli minn, ef þú ert snöggur að taka við“.  Eigum við að öfunda bjána?

Svonefndir „fag“- fjárfestar eru allir á harðaspretti hver í sína áttina. „Áttin“ er út á akrana. Uppskerutíminn fer í hönd. Þeir munu þar reyna að bjarga þvi sem eftir er af Matadorpeningum sínum með því að kaupa sem mest af uppskeru jarðar af hveiti, maís, sojabaunum, kartöflum, ólívum, hnetum.... botnið vísuna. Svo verða herlegheitin boðin okkur til sölu eins og bófarnir í Sómalíu gera í dag við soltinn lýðinn - með mat sem nytsamir sakleysingjar hafa safnað saman til að gefa börnum almættisins. Þeir geta í sandbylnum hrópað eins og Castro: „Socialismus o muerte!“ Við gefumst aldrei upp þó ´móti blási. Þeir geta þá gert eins og Eþíópíustjórnin um árið og keypt sér Viskí fyrir sjóðinn.

Heimsku og sjálfmiðun Homo Sapiens eru lítil takmörk sett önnur en þau sem náttúruöflin setja okkur ... en annars... það er víst vatn á Mars svo hver veit nema okkur sé borgið eftir allt saman? Allir þangað!  Það er áreiðanlega hægt að finna vogunarsjóði sem vilja selja hlutabréf í þá ferð. Munið að hafa með ykkur farsíma og gulrótafræ.

 

Athugasemdir

[Ragnar S. Ragnarsson (IP-tala skráð) 5.8.2011 kl. 22:27]

Fín skrif Guðmundur

Já fjármálaráðherrann var býsna sperrtur þegar hann hreykti sér af einhverju sem heitir "lágt skatthlutfall" miðað við einhver önnur lönd.  Hann minntist hinsvegar ekkert á samanburð á kaupmætti launa enda hentaði það ekki í plöggið.

[Haraldur Hansson, 5.8.2011 kl. 22:27]

Flott færsla. Og takk líka fyrir Moggagreinina um hvíta koffortið í Brussel, sem var jafnvel enn betri.

[Guðmundur Kjartansson, 5.8.2011 kl. 22:44]

Takk .... en vandinn er samt þessi: Hann hljómaði eins og óvanur þurrkublaðasali.. hann veit ... ... ekki neitt. Ég votta honum bara samúð mína yfir að hafa lent í þessu skelfilega starfi. Hann vill vel. Bara svo því sé til haga haldið.

Hann ætti frekar að vera einhversstaðar að hjálpa okkur að finna heitt vatn og aðstoða okkur við að virkja það. Miklu vinsældavænna.

[Runar Gudmundsson (IP-tala skráð) 6.8.2011 kl. 11:13]

Þakka þer fer ekki að liða að þvi að við forum að losna við þessa stjorn þarf maður virkilega að fara ut i garð að akalla natturuoflin að losa okkur við  við þettað rusl ur Stjornarraðinu eg er farin að fa utbrot þegar eg se Arna Pal  a skerminum annað eins undur hefur ekki fæðst her a landi i 1000 ar

[Kristinn V.Jóhannsson (IP-tala skráð) 6.8.2011 kl. 12:58]

Þú ert vel pennafær Guðmundur. Og alger besserwisser sýnist mér. Þú veist allt! Hvað sagði Steingrímur rangt í þessu viðtali?

[Ingibjörg (IP-tala skráð) 7.8.2011 kl. 15:07]

Skemmtileg lesning :)